ҚУРБОНЛИКНИНГ ФАЗЛИ

      Қурбонлик — Қурбон ҳайити кунларида Аллоҳ таолога яқинлик ҳосил қилиш ниятида сўйиладиган ибодатдир. Бу амал Иброҳим алайҳиссалом ва ўғиллари Исмоил алайҳиссалом воқеаси билан боғлиқ буюк суннатлардан ҳисобланади. Қурбонлик фақат ҳайвон сўйиш эмас, балки унда раҳм-шавқат, поклик, ихлос ва одоб ҳам мужассам бўлиши керак.

Аллоҳ таоло Қуръон каримда марҳамат қилади:

{ لَن یَنَالَ ٱللَّهَ لُحُومُهَا وَلَا دِمَاۤؤُهَا وَلَـٰكِن یَنَالُهُ ٱلتَّقۡوَىٰ مِنكُمۡۚ كَذَ ٰ⁠لِكَ سَخَّرَهَا لَكُمۡ لِتُكَبِّرُوا۟ ٱللَّهَ عَلَىٰ مَا هَدَىٰكُمۡۗ وَبَشِّرِ ٱلۡمُحۡسِنِینَ }

(Ҳаж сураси, 37-оят)

     Уларнинг гўштлари ҳам, қонлари ҳам зинҳор Аллоҳга етмас. Лекин унга сиздан тақво етадир. Шундай қилиб, сизни ҳидоят қилгани эвазига Аллоҳга такбир айтишингиз учун уларни сизга бўйсундириб қўйди. Яхшилик қилгувчиларга башорат бер.

    Банда Аллоҳни қанча улуғласа, шунча оз. Биргина хидоятга бошлаб қўйгани учун қанча такбир айтса, оз. Қурбонлик қилиш ҳам, Аллоҳнинг йўлида ҳар қандай қурбонлик беришга тайёр эканини кўрсатиш ҳам ўша хидоят учун Аллоҳ таолони улуғлашдир.

   Имом Абу Ҳанифа мазҳаблари бўйича, моли закот бериш нисобига етган муқим одамга қурбонлик қилиш вожиб бўлади.

Қурнонлик қилишлик ислом динида молиявий-баданий ибодат ҳисобланиб, у бандани аллоҳга яқинлаштирадиган улуғ амаллардандир. Бу тўғрисида ҳадиси шарифда шундай марҳамат қилинади:

حَدَّثَنَا أَبُو عَمْرٍو مُسْلِمُ بْنُ عَمْرٍو الْحَذَّاءُ الْمَدَنِيُّ قَالَ: حَدَّثَنِي عَبْدُ اللَّهِ بْنُ نَافِعٍ الصَّائِغُ، عَنْ أَبِي الْمُثَنَّى، عَنْ هِشَامِ بْنِ عُرْوَةَ، عَنْ أَبِيهِ، عَنْ عَائِشَةَ أَنَّ رَسُولَ اللَّهِ ﷺ قَالَ: مَا عَمِلَ آدَمِيٌّ مِنْ عَمَلٍ يَوْمَ النَّحْرِ أَحَبَّ إِلَى اللَّهِ مِنْ إِهْرَاقِ الدَّمِ، إِنَّهَا لَتَأْتِي يَوْمَ الْقِيَامَةِ بِقُرُونِهَا وَأَشْعَارِهَا وَأَظْلَافِهَا، وَإِنَّ الدَّمَ لَيَقَعُ مِنَ اللَّهِ بِمَكَانٍ قَبْلَ أَنْ يَقَعَ مِنَ الْأَرْضِ، فَطِيبُوا بِهَا نَفْسًا

    Оиша родияллоҳу анҳодан ривоят қилинган ҳадисда Росулуллоҳ соллоллоҳу алайҳи васаллам айтдилар: “Қурбонлик куни Одам боласининг Аллоҳга энг севимли бўлган амали қон оқизишдир (қурбонлик қилишдир). Албатта, у жонлиқ қиёмат куни шохлари, туёқлари ва жунлари билан келади. Албатта, қон эрга томишидан олдин Аллоҳнинг ҳузуридаги олий мақомга этади. Шундай экан, қурбонликни хушнудлик билан қилингиз" (Сунан Термизий).

    Қурбонлик Исломдаги улуғ ибодатлардан биридир. Уни чиройли одоблар билан адо этиш мусулмоннинг иймони ва гўзал ахлоқини кўрсатади. Ҳайвонга раҳм қилиш, ихлос билан амал қилиш, гўштни муҳтожларга улашиш ва суннатга мувофиқ иш тутиш қурбонликнинг баракасини оширади.

Аллоҳ таоло барча ибодатларимизни қабул қилсин. 

Ризаев Ғайрат - Имом Термизий ўрта махсус ислом таълим муассасаси ўқитивчиси 

“Имом Термизий” ЎМИТМ матбуот хизмати