ИСТИҚЛОЛ — МАЪРИФАТ ЧИРОҒИ

Мустақиллик — халқимизнинг ўз тақдирини ўзи белгилаши, миллий ўзлигини англаши, асрлар давомида шаклланган қадриятлари ва бой маънавий меросини қайта тиклаши учун кенг йўл очган буюк неъматдир. Ўзбекистон истиқлолининг 35 йиллиги арафасида босиб ўтилган шарафли йўлга назар ташлар эканмиз, мамлакатимиз ҳаётининг барча жабҳаларида, хусусан, илм-фан, таълим ва маърифий соҳаларда амалга оширилган улкан ишлар алоҳида эътиборни тортади.

Зеро, мустақиллик йиллари халқимизнинг кўп асрлик илмий ва маънавий меросини янги авлодга етказиш, буюк аждодларимиз қолдирган нодир манбаларни чуқур ўрганиш ва уларнинг жаҳон сивилизатсияси тараққиётига қўшган ҳиссасини кенг тарғиб этиш учун беқиёс имкониятлар даври бўлди. Мустақиллик йилларида таълим тизимини тубдан ислоҳ қилиш, замонавий билим маскани — мактаб, коллеж ва олийгоҳларни жаҳон андозалари даражасида ривожлантириш борасида қатор муҳим қадамлар қўйилди.

Мисол учун, мамлакатимизнинг турли ҳудудларида янги олий таълим муассасалари, жумладан хорижий университетларнинг филиаллари очилди, бу эса ёшларимизга ўз юртида туриб жаҳон андозасидаги таълим олиш имконини яратди. Шунингдек, ҳар йили минглаб иқтидорли талабалар давлат гранти асосида хорижий етакчи университетларда таҳсил олиш, малака ошириш ва тажриба алмашиш имкониятига эга бўлмоқда

Мустақиллик йилларида, айниқса сўнгги йилларда амалга оширилган диний-маърифий соҳадаги ислоҳотлар натижасида ёшларни соғлом эътиқод, юксак маънавият, илмга интилиш ва Ватанга садоқат руҳида тарбиялашга қаратилган ишлар янги босқичга кўтарилди. Хусусан, Имом Бухорий, ат-Термизий, Бурҳониддин Марғиноний, Абу Мансур Мотуридий каби буюк аждодларимизнинг илмий-маънавий меросини чуқур ўрганиш мақсадида ҳудудларда халқаро илмий-маърифий марказлар ва мажмуалар барпо этилди, уларнинг асарлари илмий асосда таржима қилиниб, кенг жамоатчиликка тақдим этилмоқда.

Диний таълим муассасаларида ўқув дастурлари янгиланиб, талабаларга чет тиллари, замонавий ахборот технологиялари ва гуманитар фанларни ҳам чуқур ўрганиш имконияти яратилди. Бундан ташқари, динлараро ва миллатлараро тотувликни мустаҳкамлаш, диний бағрикенглик ғояларини тарғиб қилиш борасида ҳам изчил ишлар амалга оширилмоқда, бу эса жамиятимизда тинчлик ва барқарорликнинг мустаҳкам пойдеворига айланмоқда.

Бугунги кунда эркин ва фаровон ҳаёт кечириб, фарзандларимизни тинч осмон остида тарбиялаётганимиз, илм-маърифат сари интилиш учун кенг имкониятларга эга бўлганимиз учун Яратганга чексиз шукроналик билдирамиз. Ушбу тинч-осойишта кунларни, мустақил Ватанимизнинг ҳар бир ютуғини, фарзандларимизнинг чароғон келажагини неъмат деб билиб, бу неъматнинг қадрига етиш, уни асраб-авайлаш ва келгуси авлодларга муносиб етказиш барчамизнинг муқаддас бурчимиздир.

Шукроналик — нафақат тил билан айтилган сўз, балки ҳалол меҳнат, самимий ният ва Ватанга садоқат билан исботланадиган амалий фазилатдир. Шу боисдан ҳар биримиз ўз касбимиз, фаолиятимиз доирасида фидокорона меҳнат қилиш, ёш авлодни илм-маърифатли, инсофли ва ватанпарвар қилиб тарбиялаш орқали мустақиллик неъматига бўлган шукронамизни амалда намоён этишимиз лозим.

Бугунги кунда ёшларимиз аждодлар меросидан баҳраманд бўлиб, замон талабларига мос билим ва кўникмаларни эгаллаб, мустақил Ватанимизнинг келажагини қуришда фаол иштирок этмоқдалар. Хулоса қилиб айтганда, истиқлол бизга нафақат сиёсий озодлик, балки илм-маърифат йўлида чекланмас имкониятлар ҳам тортиқ этди. Бу буюк неъматнинг қадрига етиш, уни асраб-авайлаш ва келгуси авлодларга муносиб етказиш — барчамизнинг муқаддас бурчимиздир.

Имомиддин Бобоқулов – Маънавий-маърифий ишлар бўйича директор ўринбосари

“Имом Термизий” ЎМИТМ матбуот хизмати