ЯЪЖУЖ ВА МАЪЖУЖ ҚАВМИ ҚАНДАЙ КЎПАЯДИ?

Аллоҳ таолога ҳамду сано жанобимизга саловоту саломларимиз бўлсин. Қиёмат аломатлари борасида кўплаб оят ва ҳадислар бор. Ушбу аломатлардан бири Яъжуж ва Маъжужлардир. Аллоҳ таоло каломида марҳамат қилади:

«Улар: «Эй, Зулқарнайн, албатта, Яъжуж ва Маъжуж ер юзида бузғунчилик қилгувчилардир. Биз сенга харож берсак, биз билан уларнинг орасида тўсиқ қилиб берурмисан? » дедилар». Каҳф сураси (94-оят). Уммул мўминин Зайнаб (р.а)дан ривоят  қилинади: Расулуллоҳ (с.а.в) бир куни унинг олдига  хавотирланган ҳолда кириб келдилар:

– Яқинлашиб қолган ёмонликдан арабларга вайл бўлсин. Бугун Яъжуж ва Маъжуж тўғонидан мана шунча очилди (Пайғамбаримиз (с.а.в) икки бармоғини ҳалқа шаклига келтириб кўрсатдилар).

– Зайнаб онамиз айтади: "Мен Расулуллоҳ (с.а.в) дан сўрадим:

– Ё Расулуллоҳ! Орамизда солиҳ инсонлар бўлса ҳам, ҳаммамиз ҳалок бўламизми? 

– “Ҳа” – дедилар Пайғамбар (с.а.в), – “агар ифлосликлар кўпайиб кетса”.

Ибн Ҳажар роҳимаҳуллоҳ  "Фатҳул Борий"да ёзади: "Олимлар "ифлосликлар" калимасини "зино", валади зинолар ва фисқу фужур", дея шарҳлаганлар". 

“Бадъул амолий” китобининг шарҳида қуйидаги маълумотлар келтирилган: Зул-қарнайн Яъжуж ва Маъжужни  икки тоғ орасида ғорга ўхшаш бир маконга қамаб қўйди ва бу икки тоғни темир ва мисдан тўғон қилиб, устига мис ва қўрғошин қўйди. Яъжуж ва Маъжуж қовми ҳар куни бу тўсиқни бузишга ҳаракат қилишади, аммо эплолмайди. Кун бўйи қаттиқ ишлаб қийналганларидан кейин бир бирларига “эртага давом этамиз, бугунга етарли”  дейди. Эртасига келсалар кеча бироз очган жойларини яна қайта беркилган холда топишади. Шу зайлда бир неча кун ҳаракат қилишиб, охир оқибат ғордан чиқишга муваффақ бўлишади. Уларнинг ғордан чиқиши эса қиёматнинг белгиларидан бири бўлиб, унинг фитнасидан Аллоҳим бизларни сақласин. 

Яъжуж ва Маъжуж асли ким? Яъжуж ва Маъжуж қавми қандай кўпайади? Шу каби савол туғлиши табиий. Жавоб қуйидагича: Улар инсонлардан иборат катта бир тўда бўлиб, кутилмаганда Қиёматга яқин чиқади. Улар чиққанларидан бошлаб, ер юзини бузғинчилик ва фасодга тўлдирадилар. Лекин уларнинг чиқиш вақти, қайси ғорда тўсиб қўйилгани ҳеч кимга аниқ эмас. Аллоҳ таолодан бошқа ҳеч ким уларнинг қачон чиқишини билмайди. Расулуллоҳ (с.а.в) дедилар:

“Яъжуж ва Маъжуж (ҳам) Одам зурриёти. Уларнинг ҳар бири ўзидан мингта ва ундан кўп бола қолдирмагунча ўлмайди” дедилар. Ҳар бир зурриётидан биттаси одам боласининг мингтасига тенг бўлиб, мусулмонлар уларга карши жанг қилишга журъат қилолмайди. Ийсо алайҳиссалом мусулмонларни Тур тоғига олиб чиқиб, Аллоҳ таолодан ўзларига ёрдам беришини, уларни ҳалок қилишини ёлвориб сўрайди. Аллоҳ таоло улардан ҳар бирини бўйнига кириб кетадиган қуртни туширади. Қурт уларни ҳалок қилади. Ўлимтик ейдиган қушлар уларни баъзи қисмини еб тугатгач, Аллоҳ таоло уларнинг сасиган ҳиди ер юзини бўлғамаслиги учун ёмғир ёғдиради. Ёмғир кўп ёққанлигидан барчасини денгизга оқизиб кетади. 

Бу ишлар ҳаммаси Аллоҳ таолонинг иродаси ва хоҳиши билан бўлади. Аллоҳим барчаларимизга оҳир замон фитналаридан ва Яъжуж ва Маъжужнинг ёмонлигидан офият берсин, ўз ҳифзида сақласин.

Тўхтаев Насрулло - “Имом Термизий” ўрта махсус ислом таълим муассасаси ўқитувчиси

“Имом Термизий” ЎМИТМ матбуот хизмати